KURUNZI ZA SIASA: RAIS MAGUFULI AZINDUA NDEGE MBILI MPYA, AWATAKA ATCL KUBADILIKA

Rais wa Jamhuri ya Muungano wa Tanzania Dkt John Pombe Magufuli na mkewe Mama Janeth Magufuli pamoja na maafisa wengine waandamizi wakiwa kwenye ndege mojawapo baada kuzindua rasmi ndege mbili mpya aina ya Bombadier Q400 zilizonunuliwa na serikali kwa ajili ya Shirika la Ndege la Tanzania (ATCL) katika Uwanja wa Ndege wa Kimataifa wa Dar es salaam leo Jumatano Septemba 28, 2016

Rais DKT JOHN MAGUFULI amelitaka shirika la ndege nchini ATCL kubadilika na kufanyakazi kwa weledi ili kumudu ushindani katika kutoa huduma ya usafiri wa anga nchini. 
Rais MAGUFULI ametoa kauli hiyo jijini DSM wakati wa uzinduzi wa ndege mpya zilizonunuliwa na serikali kwa lengo la kuboresha usafiri wa anga nchini ambapo amewataka watendaji wa shirika hilo kuzitumia ndege hizo kwa manufaa ya taifa zima na kumudu ushindani wa kibiashara katika usafiri wa anga.
Pia Rais MAGUFULI amesema serikali inatarajia kununua ndege zingine mbili kubwa zenye uwezo wa kubeba abiria mia moja sitini na nyengine yenye kubeba abiria mia mbili na kukuza uchumi wa nchi kupitia sekta ya usafiri wa anga.
Katika hafla ya uzinduzi wa ndege hizo zilizofanyika katika uwanja wa ndege wa kimataifa wa mwalimu Julias Kambarage Nyerere, Rais MAGUFULI amesema ndege hizo zina ubora unaokubalika na zenye kumudu mazingira ya viwanja vingi vya ndege hapa nchini.



Written By RAMADHAN MPENDA
September 28, 2016 

Posted by Elias Magugudi

KURUNZI  ZA SIASA

Email. Eliasmagugudi2016@gmail.com